Burat Tavo
PIEMONTÈIS CHE MI I SON
Dabon mi i l'hai nen d'autre soste 
da fòra dal mond ëd mia lenga. 
'L piemontèis a l'é mè pais. 
Mi i l'hai gnente d'autr da difende 
mach ës lagh ëd laità bujenta 
coma na colòbia sarvaja 
che d'andrit e fòra am nuriss.

'L piemontèis a l'é mè pais. 
Gnun d'autri drapò d'andeje dapress 
che coste paròle 'd rista tròp dura 
bagnà tëssua con la mia saliva 
e che a quata a j'euj mè còrp patanù. 
'L piemontèis a l'é mè pais. 
Tuta la resta a l'é mach d'anviron.