Teponazcuicatl
("Pregón del Atabal")
Francisco Plácido

Texto en náhuatl del Teponazcuicatl

Nican ompehua teponazcuicatl
Tico, tico, toco, toto, auh ic ontlantiuh cuicatl Tiquiti, titito titi
[I]
Tollan aya huapalcalli manca no zan in mahmani coatlaquetzalli yaqui ya cauhtehuac Nacxitltopiltzin on quiquiztica ye choquililo in topilhuan ahuay ye yauh in polihuitiuh nechcan tlapallanho ay.
[II]
Nechcayan cholollan oncan tonquiza ya poyauhtecatitlan in quiyapanahuiya y acallan onquiquiztica ye choquililon ect.
[III]
Nonohaulco ye nihuitz ye nihuiquecholi nimamali teuctla nicnotlamatia oyahquín noteuc yeihuitimali nechyaicnocauh ya nimahtlacxochitl ayao ayao o ay ya yyao ay
[IV]
In tepetl huitomica niyaychocaya axalihqueuhca yehuayan nicnotlamati ya oyaquin noteuc ect.

[V, folio 27 recto]
Yn tlapallan aya mochieloca monahuatiloca ye cochiztla o anca cazanco ayao ayao ect.
[VI]
Zan tiyaolin ca ye noteuc yc ihuitimali tinahuatilo ya ye xicalanco o anca zacanco ect.
[VII]
Ayyanco ayyanco ayamo aye ayhuiya ayanco ayanco ayyanco ayamo aye ahuiya que yemamaniz mocha moquiapana oquen ye mahmaniz moteuccalla ticyaycnocauhqui nican tollannonohualco ya yya yyao ay
[VIII]
Yn ye quintichoca ya teuctlon timalon que ye mahmaniz mochan ect.
[IX]
Yn tetl in quahuitl oon timicuilotehuac nachcan tollan y yn oncan in otontlatoco Naxitl topiltziny ayc polihuiz ye motoca ye ic ye chocaz i momacehual ay yo
[X]
Zan can xiuhcalli ya cohuacalla ya y no ticmantehuac, nachcan Tollanin oncan yn otontlatoco Naxitl topiltzin ect.Tico toco toco tiquitiquiti quiti quitoZan ic mocueptíuh
[XI]
Yn tlapapalxochicentli ni yol aya, nepapan tonacan xochitl moyahua ya oncuepontimoquetzacoyana ya aya ye teoyaixpan tona a Santa María ay yo
[XII]
Atl ya cuica ya zan quetzalaxihuitl tomolihui yana ya ye nitlachihualycel teotl y ye dios aya ni itlayocol ao ya yehcoc ya ect.
[XIII]
Zan ca tlacuilolpan nemi a moyollo amoxpetlatl ypan toncuica ya tiquimonyaitotia teteuctinaya in obispo ya zan ca totatzin aya oncan titlatoa atl ¡tempan ay yo
[XIV]
Yehuan dios mitzyocox aya xochitla ya mitztlacatili yan cuicatl mitzicuiloa Santa María inobispo ya ect.
[XV]

Tolteca ihcuilihuia aha aya ha ontlantoc amoxtli ya moyollo ya on ayamoch onahciticac o o toltecayootl ayc aya ninemiz ye nican ay yo
[XVI]
Ac ya nechcuiliz ac ye nohuan oyaz onicaz a an niihcuihuan aya y yancuicanitl y yehetl y noxochiuh noncuica yhuitequi on teixpan ay yo
[XVII, folio 27v.]
Hueyntetl nictequin tomahuac quahuitl nicycuiloa yan cuicatl ytech aya oncan nomitoz inquenman on in can niyaz nocuica machio nicyacauhtiaz in tlalticpac y onnemiz noyol zan ca yenican y a hualla y yanco ya nolnamico ca nemiz ye noteyo ay yo
[XVIII]
Nichoca ya niquittoa ya nicnotza noyollo ma niquittan cuicanelhuayotl aya ma nicyatlalaqui yama ya ica tlalticpac quimman mochihua on nenemiz noyol ect.
[XIX]
Zan ca teucxochitl ahuiaca yhpotocaticac mocepanoa yan toxochiuh ay ye aya oo huiyoncanqui ya itzmolini ye nocuic celia notlatollaquillo ohuaya
[XX]
in toxochiuh ycac y quiapani aya o tel cacahuaxochitl ahuiac xeliuhtihuitz a ihpotoca ya inahuiyac poyomahtlin pixahuia oncan nenehnehnemi ni cuicanitl y ye ayao ohui y oncaqui yaitzmolini ye nocuic celia ect.