Nga Iwi o Tainui
na Pei Te Hurinui Jones me Takuta Bruce Biggs
E kara e Pei, kua tutuki nga korero mou. He tangata i ngakaunui ai ki nga taonga tuku iho, he tauira na te ao kowhatu, he kanohi i whai haere i nga tapuwae o nga wheinga. E moe, ko koutou kei tua o Reao, ko matou kei te atarangi o a koutou mahi, kupu hoki. He whakarerenga iho, me poipoi, me whakahuahua, hei taanga manawa ma nga waihotanga iho i te Ao hurihuri.

Kua oti i a Takuta Bruce Biggs te whakariterite te rauhiinga kupu a Pei Te Hurinui. Ahakoa kihai a Pei i toe mai hei matakitaki a tinana, tona wairua e kite mai ana aa e maharatia ana i roto i te rerenga o te korero. He nui tonu nga painga kei te pukapuka nei. Heoi ano, taaku he whakarapopoto i te kupu hei whakanui i tona putanga mai.

Ahakoa te rangatira o nga tatai korero, ara noa te painga o te pukapuka nei kei tona reo. Me penei he korero maku, ahakoa kua kaha rawa to tatou whai kia mau tonu te reo, kahore e tika ana te tupu. Otira ma nga pukapuka penei ka kitea te tohungatanga me te pai o te reo. Ka mohiotia hoki nga rerenga aa ka maamaa atu pea te ako.

Ko nga korero mo nga tupuna, a ratou pakanga, a ratou moenga, o ratou patunga he taonga katoa. Tona pai, he whakapakari i te rangatahi e rapu nei i tetahi taumata mo o ratou whakaaro. Kei te whenua ke he taumata oneone, kei te reo he taumata whakaaro, kei te tatai me ona rerenga he taumata wairua. Koia taaku e hari nei mo nga tatai korero ka mau. Kei te marama nga korero, kahore he whakapokepoke. Ka riro hei huarahi e matau ai nga uri ki te Ukaipo aa e taea hoki te Whitinga o te ra.

Me i kore nga tangata penei i a Pei, kua riro o tatou taonga. Ara noa atu nga pukapuka, nga aha noa i whiua ki te poka, kei pokea te whanau. Kua pirau noa atu aa whakamomori tatou i tenei wa ki te whakakaupapa i o tatou tikanga.

Ko nga whakapakehatanga ehara i te mahi ngawari. Ko te kupu he tohu, engari e tohu ana i te aha. E hua i te ao ka kitea aa e tohu ana i te ao ka kore e kitea na te mea kei te hinengaro ke. Heoi, he marama tonu nga mahi a Takuta Biggs. E tika ana koe kia mohiotia ai hei pou herenga korero. Kua oti i a koe te paihere i nga reo e rua aa kua whakairotia ki te kapu o te pepa. Ko kona whakamatautau i nga uri, kei ngoikore.

He ai ki nga korero i tinihangatia ai a Pei i te wa i perehitia ai te pukapuka e meinga nei ko Tainui. Ko te te tangata i whakaingoatia ko Kelly. Kihai nga tukunga mai a Pei i whakamihia aa whakamaramatia ai. Kua tu ke mai tenei pukapuka, kua mohiotia ai he tangata tonu a Pei ki te patapatai, ki te whai i ona wheinga kia mau tonu ai nga taonga tuku iho. Ta te mea e rua ke nga reo kei tenei pukapuka, kotahi ki to te mea i runga nei, kua oho mai te whenua, kua pupu nga whakaaro, kua mura te wairua.

Kua oti i roto i tenei pukapuka he tauira ma nga iwi o te motu. Nga tatai korero mo te waka o Tainui me ona uri. Kua riro ma Tainui e whakaoho i a tatou, kia puta i a tatou i ia iwi, i a iwi he tauira penei.

Ki te rangatahi, wanangatia nga kupu nei. E rua ke nga reo aa e tohua mai ana e rua ke nga ao hei tomokanga ma koutou.

Kia a Takuta Biggs, nga mihi ki a koe. Ki te Poari o Tainui, kua kitea te tauira e te motu. Ki Te Atairangikaahu, me tautoko i ou korero ka tika. Mai nga rerenga korero kua oti i a Pei me tana tamaiti a Takuta Biggs ka matauria ai te ara e puta ai te rangatiratanga.