Hiru gezi
Altzatu egin dut eskuineko besoa ortzadarrerra
eta hiru errainu gori ere hartu ditut ezkerreko eskuaz
arkua eta geziak bailiran iaurkititzeko:
bata eguzkira gaua sortzeko -eta gaua sortu da-
bestea munduak bereizten dituen ohiala urratzeko
-eta urratu dira horma eta oihal guziak lurrean-
eta hirugarrena ene buruaren aurka zuzentzen dut.

ene belaunaldiko buru hobezinak
ez zituen erotasunak suizidiora eraman
ez dira erakunde armatuko liberatuak
eta ez doaz balantzaka heroina xurien xerka
beren bizitzari zentzu bat aurkitu ezean
opusekoak baino haur gehiagoz erditzen dira
ene belaunaldiko buru hoberenak
eguneroko bizitzan higatzen dira
familia ugari bati amore eman ezinez
eta poema luzeak irakurtzeko astirik gabe
ez dakit zer senditzen duten eguberrietan
gutaz oroitu eta christmas doratuak igortzean

hor
horma lohi horretan 
duk eskegia
lehioa
begira ezak
argia
begira ezak
leihoa
duk eskegia
horma lohi horretan
hor