Gastone Vandelli (1921-)

Poêta rafinè e pén d dêrma par dimónndi rigésster difarént, Vandelli l à vént socuànt prèmi ed poesî dialetèl e, dal 1979, l à publiché al sô prémm lîber, "Apanna l èter dé". L é ón di mutûr dal Circolo culturale dialettale "L Archiginèsi". Qué a v dän un canpionèri di sû argumént, ch'i van dala sâtira ala descriziån quèsi metafîsica dla Natûra. 

Poeta raffinato e versatilissimo, Vandelli è vincitore di numerosi premi di poesia dialettale. Nel 1979 ha pubblicato il primo libero, intitolato "Soltanto l'altro giorno". È uno dei motori del Circolo culturale dialettale "L Archiginèsi". Diamo qui una selezione dei suoi temi, che vanno dalla satira alla descrizione quasi metafisica della Natura.


La poesî 
 
Amîg, a sån d acôrd int al pensèr  
che "Al månnd l à bisåggn dla poesî"
ch'l'ajûta l òmn a rédder, a zighèr,  
spazièr fra sentimént e fantasî,  

ch'la séppa religiåusa o popolèr,  
bucòlica, dramâtica, gegnèl,  
o d antîga cultûra dialetèl,  
una cantè opûr un madrighèl.  

Ai bâsta un gnínt, un våul d un pasarén,  
al córrer dl'âcua cèra int un canèl,  
na bèla dòna, al såul, un bichîr d vén,  
par fèr nâser un vêrs grand, imurtèl.  

O un stémmol ch'l arîva da luntàn  
d una ziveterî nèda dal côr,  
l amåur, un fiåur, l'êco d una canzån  
o l inuzänt fantastichèr däl fôl.  

Äl parôl bèli ch'i cànten l'amizézzia,  
la pès, la vétta, la solidarietè,  
äl parôl dûri cånter l'ingiustézzia,  
äl guèr, la fâm, al cròl dla libartè.  

O äl nòt armugnåusi d un viulén,  
i culûr dl urizånt, la lónna, una man  
che delichèta la prutèz un pinén,  
al versegèr estråus dl'ispiraziån.  

E pó, cs'as pôlel dîr dla poesî?  
Ch'l'é al fâsin dla parôla, un'emoziån,  
l'é mûsica, memòria, nustalgî,  
e un bèl rifûg' dl'imazinaziån.