Adriana Pallotti - Poetassa nôva mo ch'l'à bèle avó un zêrt suzès, Adrièna Pallotti, ed Marzabòt, la lèz i sû cuvlén durànt i cunzêrt dal fradèl Gianni, cantànt anca ló nôv.

Poetessa nuova ma già di un certo successo, Adriana Pallotti, di Marzabotto, legge i suoi componimenti durante i concerti del fratello Gianni, cantante anch'egli di nuova apparizione. 


L aniversèri

Che dèta, cal sî ed dsànber,
sculpé int al calendèri...
e l é un pôc come murîr
ad ògni aniversèri.

Un dé cunpâgna un èter.
Na lûs da mèz invêren...
ma un zîl, trât in ingân,
al parturé l infêren.

Un bûs dänter na scôla,
naigher cm al carbån,
e par dågg' ed chi studént
la fén d ògni ilusiån.

Ch'a n sénta mâi pió dîr
che "acsé l à vló al destén!"
La cåulpa la fó int i ûrden
ed chi dû o trî asasén.

In fånnd ai pî d n altèr
una muntâgna ed fiûr,
e un sguèrd fât ed silänzi
a chi pôver genitûr.

Par cójjer una speranza
e craddr int un surîs
ai ò sunè a una pôrta:
qualla dal Paradîs.

Una våus, in luntananza,
drétta al côr la m à culpé:
"Tåurna coi pî par tèra
se t zairc la veritè!"

Ma veritè e giustézzia
i én armès int al mistêri
suplé, come chi zûven,
al bûr d un zimitêri.

Par dågg' ed chi ragâz
ormâi an i é pió stòria...
e ad ògni aniversèri
a m inchén, ala memòria!