TONINO GUERRA

Cantèda zdòt




Quant che ma Pìdio e' calzulèr
u i è scap e' méral, émm aspitè
sl'avnéva te curtóil e ogni òmbra che paséva,
e' paréva ch'e'fóss léu. E invéci u n'éra.

Però una sàira sòura la siva dal cani
u i éra una ròba nira ch'la dindléva
e la s guardéva sa di ucìn ch'l'éra péunti da curtèl.
Alòura a s sémm scansè da la finèstra
e a fémmi fóinta da spustè al scaràni.



[tratta da: Tonino Guerra, Il Miele, Maggioli editore, Rimini, 1982 (Premio Biella).]