I arlói dla staziån 


A Bulåggna chi an ramänta 
l ân dal méll novzänt utanta, 
dû d agåsst, int äli åur dîs 
e ventzénc minûd prezîs? 
Na terébbil esplosiån 
pròpri däntr ala Staziån 
l'à scòs tótta la zitè: 
e i arlói i s én farmè... 
e i arlói i s én farmè! 

Zitadén! Curî, curî, 
prónti a fèr tótt quall ch'a psî.
Ardusè tótti äl risåurs, 
prodighè al vòster sucåurs, 
curî là in sèla d aspèt 
che i tranviêr col träntasèt, 
tenpestîv, i én bèle lé 
par carghèr i mûrt e i fré... 
par carghèr i mûrt e i fré! 

Con un slanz mótt e sinzêr 
feroviêr e pasegêr, 
cûg, fachén e camarîr, 
tanta zänt ed tant amstîr, 
i eseguéssen i ûrden dûr 
d infarmîr, suldè, dutûr: 
scavè in fûria! Mo fè pian! 
Coi badîl äli óng', äl man... 
coi badîl, äli óng', äl man! 

Che parfîdia ste teråur! 
E dåpp, là, in Piâza Mazåur, 
che dulåur e che mestézzia: 
ma in duv êla la giustézzia? 
Chi l'adrôva? Chi l'à véssta?
E la bånba di faséssta 
int al spâzi d un minûd 
l'à lasè tótt cal gran vûd... 
l'à lasè tótt cal gran vûd! 

Dû d agåsst, int äli åur dîs 
e ventzénc minûd prezîs, 
una bèrbara esplosiån 
la dsfé mèza la Staziån 
ch'a vdän là ricostrué. 
Ma chi mûrt e tótt chi fré, 
quall ch'i vôln incû da nó: 
che chi arlói i n s fairmen pió,
che chi arlói i n s fairmen pió!