I prémm tranvâi 

I êrn i tranvâi elètric anc luntàn  
quand prinzipiò a fères vaddr int äl zitè  
un quèlc sarvézzi d Cmónna opûr privè  
fât da un runzén o dû, e un caratån.  

Quasst é zêrt e sicûr ch's andèva pian.  
Mo alåura l'êra sänper cumditè,  
sänza cuntèr che quî ch'fèven cla strè  
i avêvn al tänp ed fèr conversaziån.  

Un dé, un "habitué" al tîra drétt  
sänza andèr só. Al cucîr la fróssta scûria  
par dsdèrel s'l é distrât. Mo cl èter, zétt.  

L êra un vciarlén, antîg pensionè d Cûria.  
Al tranvîr al le ciâma: "Sgner Sufrétt!  
Bån, an vén só?" "Nå, sèl, parché ai ò fûria!"...