Al cumàss 

Un drughîr al bravèva a un sô cumàss,  
ón d chî ragâz ch'i én anc sänza esperiänza,  
vdand che la zänt l'andèva vî bän spass  
parché dmandànd un quèl, låur i êren sänza.  

"As dîs ch'l é in viâz, opûr se ón vôl dal råss  
da ténnzr as n esibéss ón dla secuänza  
di róss, s'an i é l uguèl. S'a fè l istàss  
par l avgnîr, a v dâg bôna lizänza!"  

L avé tanta scagâza, st ragazlàtt,  
ch'al déss sóbbit tra sé: "Padrån, te vdrè  
ch'a vâg pió in là ch'ne tè, d un bèl pzulàtt".  

E apanna ch'as dé al chès ch'ai véns dmandè  
d cla chèrta fénna ch's drôva al... gabinàtt,  
"L'é in viâz" al déss "mo ai n ò dla smerigliè..."