MANUEL ASUR 
(1947-)

Atiendi, Asturies 


***************


Naz en Güeria, Samartín del Rei Aurelio, en 1947. Miembru del grupu 
Camaretá, ún de los entamadores de la recuperación cultural n´Asturies y que 
musicó poemes del mesmu y d'otros poetes. Tien asoleyaos dellos llibros de 
poemes y ún de narraciones y una obra de teatru.


Un pueblu ensin alcordanza
nun tien futuru
E. Bloch
Atiendi, Asturies, atiendi 
lo que falo na to fala 
anque nos oyíos tengas
muncha llingua castellana.

Sé que sofristi abondu
que fusti más nueche qu'alba 
que fixisti too dafechu
lo que sentíes pel alma.

Selo bien, pero'l dolor 
golviósete una mordaza 
dexándote a fuerza sombra
una llaceria na fala.

Esa llaceria espardióse
comu una postiella gafa
fendió to llingua llariega 
fasta torgate falala.

Y la hestoria que pulsiasti
cola pallabra bien alta
quedando fo callandina
como ensin acordanza.

Y ensin acordanza un pueblu 
nun tien futuru a la llarga.
Atiendi, Asturies, atiendi 
lo que falo na to fala.